სმენის კვირეული ოზურგეთში

26 თებერვლიდან 28 თებერვლის ჩათვლით საქველმოქმედო ფონდმა ,,აი ია” ქართულ-გერმანული მუსიკათერაპიის ცენტრმა ,,ბეკარი” ოზურგეთის მერიის მხარდაჭერით სხვადასხვა აქტივობები განახორციელა.
• კონსულტაციები გაეწიათ იმ ოჯახებს და ბავშვებს, რომელთაც აქვთ სმენის დაზიანება და მეტყველებასთან დაკავშირებული პრობლემები;
• ჩატარდა მუსიკათერაპიის სეანსები ფსიქო-ემოციური პრობლემების მქონე ბავშვებისთვის;
• გაიმართა კითხვა-პასუხის სესია ნეიროფსიქოლოგებთან მშობლებისთვის.
• ჩატარდა ვორკშოპები საბავშვო ბაღისა და დაწყებითი კლასების მასწავლებლებისთვის
• გაიმართა შეხვედრები ბაღის აღმზრდელებისა და სკოლის დაწყებითი კლასის პედაგოგებთან – უსაფრთხო სმენის საკითხებთან დაკავშირებით; პედაგოგებს, ფონდის წარმომადგენლებმა საჩუქრად პრაქტიკული სახელმძღვანელოები გადასცეს. აღნიშნული აქტივობა ოზურგეთის მუნიციპალიტეტის მერიის განათლების, კულტურის, სპორტის, ახალგაზრდულ საკითხთა, ჯანდაცვისა და სოციალური მომსახურების სამსახურის – განათლებისა და გენდერულ საკითხთა განყოფილების ორგანიზებით ჩატარდა.
ოზურგეთის მერიას, საქველმოქმედო ფონდს ,,აი ია” და მუსიკათერაპიის ცენტრ ,,ბეკარს” შორის თანამშრომლობის მემორანდუმი გაფორმდა, რაც სპეციალური საჭიროების მქონე პირთათვის ოზურგეთში, საგანმანათლებლო და სოციალურ-ეკონომიკური პროგრამების მხარდაჭერის გაზრდასა და სერვისებზე ხელმისაწვდომობის გაფართოვებას შეუწყობს ხელს.
დოკუმენტს ხელი ოზურგეთის მერმა ავთანდილ თალაკვაძემ, საქველმოქმედო ფონდ ,,აი იას“ დირექტორმა ნანა გოთუამ, ქართულ-გერმანული მუსიკათერაპიის ცენტრ ,,ბეკარის“ ადმინისტრაციულმა დირექტორმა მარინა რაიდტ-ალთუნაშვილმა მოაწერეს.
„ოზურგეთის სახელით, მინდა მადლობა გადავუხადო „სმარტ კაპიტალ ჯგუფს,“ საქველმოქმედო ფონდ ,,აი, იას“ და ქართულ-გერმანულ მუსიკათერაპიის ცენტრ „ბეკარს“ ოზურგეთში ჩატარებული საინტერესო შეხვედრებისთვის და სოციალური პასუხისმგებლობისთვის, რომელიც მათ ძალიან მნიშვნელოვან საკითხში გამოხატეს. მათი გამოცდილება და რეკომენდაციები, მნიშვნელოვნად დაგვეხმარება ბენეფიციარების საჭიროებასა და ინტერესებზე მორგებული აქტივობები დავგეგმოთ,“ – აღნიშნა ავთანდილ თალაკვაძემ.